#IESbooklclub: Kadrda – Mavluda Shamirova

Men – Mavluda Shamirova, 1982-yil 25-dekabrda Toshkent viloyatining Angren shahrida tug‘ilganman. Hozirda “Angren IES” AJda temir yo‘l xo‘jaligi dispetcheri lavozimida faoliyat yuritmoqdaman.

Ishim mas’uliyatli va yuqori darajadagi aniqlikni talab qilsada, yuragimda doimiy yashaydigan va meni ruhlantirib turadigan mehrim – bu kitoblarga bo‘lgan muhabbatimdir.

Kitob o‘qish men uchun shunchaki mashg‘ulot emas – bu tinchlik, ilhom va ichki uyg‘oqlik manbai. Har bir asar, har bir satr menga hayotga boshqa nigoh bilan qarash imkonini beradi.

Ayniqsa, Abdulla Qodiriyning “Mehrobdan chayon” asari qalbimda chuqur iz qoldirgan. Ushbu asar orqali men tarix, adolat va insoniylik haqida teran mulohazalarga boraman.

Cho‘lponning “Kecha va kunduz” romanida esa o‘tmish bilan kelajak, zulmat bilan nur o‘rtasidagi kurash badiiy yondashuvda tasvirlangani menga manzur.

Yaqinda esa Nuriddin Ismoilovning “Iblis saltanati” asarini o‘qidim. Bu asar insoniyatga tahdid solayotgan yovuz kuchlar va insoniylik o‘rtasidagi kurashni yuksak badiiy darajada tasvirlaydi.

Shuningdek, Tohir Malikning “Sotilgan vijdon” asari menga chuqur ta’sir ko‘rsatdi. Asarda vijdonini yo‘qotgan insonning fojeasi va axloqiy inqiroz jamiyatdagi og‘riqli haqiqatlar bilan uzviy bog‘langan.

Kitob – bu men uchun hayot saboqlari, ichki dunyo uyg‘unligi va fikr boyligining manbai. Har bir sahifa qalbimni boyitadi, dunyoqarashimni kengaytiradi.

“Angren IES” AJ Matbuot xizmati