“O‘ZBEKISTON YOSHLARI FORUMI” DOIRASIDA OAV VAKILLARI VA YOSHLAR UCHUN PRESS-TUR TASHKIL ETILDI

OAV vakillari, jurnalist va blogerlar hamda yoshlar “Issiqlik elektr stansiyalari” AJ Sirdaryo IES filiali faoliyati va yangi qurilayotgan “ACWA Power Sirdaryo” IES bilan yaqindan tanishdilar.  

Dastlabki manzil “ACWA Power” IES bo‘ldi. Zamonaviy texnologiyalar asosida bunyod etilayotgan elektr stansiyasi Shirin shahri va Boyovut tumanlari hududida joylashgan. Mutaxassislarning ma’lum qilishlaricha, Saudiya Arabistonining “ACWA Power” kompaniyasi tomonidan qurilayotgan elektr stansiyasining quvvati 1 500 MVtga teng bo‘ladi. Korxona mas’ul rahbarlari tomonidan tashkil etilgan muloqot davomida forum qatnashchilari, OAV vakillari, jurnalistlar hamda blogerlar o‘zlarini qiziqtirgan savollarga atroflicha javob oldilar. 

-Stansiya O‘zbekiston Respublikasi Prezidentining 2020 yil 10 avgustdagi “Sirdaryo viloyatida quvvati 1 500 MVt bo‘lgan yangi issiqlik elektr stansiyasi qurilishini tashkil etish chora-tadbirlari to‘g‘risida”gi qarori asosida qurilmoqda. Korxonada yiliga o‘rtacha 12 mlrd kVt•soat elektr energiyasi ishlab chiqariladi,-deydi “ACWA Power”  bosh direktori Mubashir Ahmad Majid. 

Shuningdek, press-tur davomida qatnashchilar “Issiqlik elektr stansiyalari” AJ Sirdaryo IES filialida bo‘lishdi. 

Mazkur korxona nafaqat mamlakatimiz, balki butun Markaziy Osiyodagi eng yirik elektr stansiyasi hisoblanadi. Korxonada jami 10 ta energoblok mavjud bo‘lib, hozirgi kunda bu yerda sutkasiga o‘rtacha 42 mln. kVt. soat elektr energiyasi ishlab chiqarilmoqda. Shuningdek, stansiyada o‘z ehtiyoji uchun sarflanadigan elektr energiyasini iqtisod qilish maqsadida muqobil energiya manbalaridan samarali foydalanish yo‘lga qo‘yilgan. 

Hozirda elektr stansiyasida jami sig‘imi 2400 litrga teng bo‘lgan 12 ta quyosh suv isitish qurilmalari ishlamoqda. Joriy yilning fevral oyida esa quvvati 1,3 MVt bo‘lgan quyosh fotoelektr stansiyasi ishga tushirildi. Ma’lumot o‘rnida, elektr stansiyasida биринчи energoblokning ishga tushganiga o‘tgan 2022 yilda 50 yil to‘ldi.

Forum qatnashchilari korxonada amalga oshirilayotgan islohotlar va modernizatsiya ishlari bilan yaqindan tanishdilar. 

Eslatib o‘tamiz, “O‘zbekiston yoshlari forumi” davomida Energetika vazirligi va “Issiqlik elektr stansiyalari” AJ tomonidan Shirin shahri yoshlari uchun barpo qilingan “Yoshlar markazi”ning tantanali ochilish marosimi bo‘lib o‘tadi. Forumni ishtirokchilar uchun tashkil qilinayotgan o‘zbek estradasining yosh xonandalari ishtirokidagi gala konsert yakunlab beradi. 

“Issiqlik elektr stansiyalari” AJ matbuot xizmati